Make your own free website on Tripod.com

 

كلاسيكيات الموسيقى العربية


سيد درويش -  نصوص

إعداد وتحرير: د.أسامة عفيفى

مختارات من نصوص ألحان سيد درويش


زورونى كل سنة مرة     مقام عجم

لحن وكلمات سيد درويش


زورونى كل ســـــــــنة مرة                 حرام تنســـــــونى بالمرة

أنا عمـــــلت إيه فيــــــــــكم                 تشــــــاكونى واشــــاكيكم

أنا اللى العمر اداديــــــــــكم                 حرام تنســـــــونى بالمرة

 يا عينى ع اللى مالوش حد                    طول عمره يقاسى الوجد

 وتجـــرى دمعتــــه ع الخــد                 مســــكين حـــــاله بالمرة

 زورونى كل ســــــــنة مرة

تعليق: الكلمات المغناة بصوت فيروز مغايرة للنص الأصلى !

 

 

لحن الشيالين -  شــــد الحــزام - مقام حجاز

لحن سيد درويش - كلمات بديع خيرى

 

 شــــد الحــزام على وسطك غيره ما يفيدك

 لابـــــد عن يــــوم برضــه ويعـــدلها ســــــيدك

 وان كان شيل الحمول على ضهرك يكيدك

أهــــــون عليــــك يا حـــــر من مــدة إيـــــــدك

 ما تيالله بيـــنا انت ويـــــــاه

ونســــتعان ع الشـــــــــقا بالله

 واهو اللى فيه القسمة طلنـاه

 واللى مافيهشى ان شالله ما جاه

 ما دام بتلقى عيش وغمـوس    يهمـــك ايـــه تفضل موحــوس

 ماتحـط راســـك بين الروس    لا تقوللى لا خيــار ولا فاقـوس

شــــد الحزام

 ح اقـــولك ايه واعيـــد لك ايه كله له آخــر

 دى وكســة جامدة وجت على عينك ياتاجر

 يا وكســتك دلـــوقت لا وارد ولا صــــــادر

 يحلـــــــها ألفيـــــن حـــلاّل ربـك قـــــــــادر

قوللى فى عرض النبى يا حسين

 رايحين نلاقيها منيــن ومنيـــــن

 والإش متجــــــــوز اتنيــــــــــــن

 يا دنيا روقى جتــك البيــــــــــــن

عمـر البخيل يفضل منحـــــوس    لو علقوا على بابه فانــــوس

 فلوس دى إيه سكتر يا جاموس   هى السعادة فى غنى النفوس

 شــــد الحزام

يالله بنا يالله نلحق لاكسبريس اهـو ع الرصيـف

 وادى احنا يا دوبك لسه ماعملناش بحق رغيف

 كل المحطـات قبــــلى وبحـــرى بقـــــت لماليـــف

 يتـوب عليـنا من دى العيشــة يا لطيف يا لطيـف

 ما قطعوا لنا التليفونــــــات

وعطلـوا التلغــرافـــــــــــات

 عمركش سـمعت الدلنجــات

بيسـافروا لها بالباسبورتات

 غلب حمار اللى له حما ر    يحمــله لك ست انفــــــــار

واهو السفر فى الأيام دى    صار ع البهايم ليل ونهــار

 قرب شيــّـلنى شيّـــل    لا تقوللى كتيـر وقليّــل

لا تقوللى كتير وقليل    عمر الشـدة ما تطـــوّل

 عمر الشدة ما تطـوّل    بكرة نهيص زى الأول

هيلا هيلا هيلة هــيلة    هيلا هيلا هيلة هـــــيلة

 

 

لحن الصنايعية -  الحلــــوة دى    مقام حجاز

لحن سيد درويش            كلمات بديع خيرى

 

 

الحلوة دى قامت تعجـــن فى البدريـــــــة

 والديك بيـدن كوكو كوكو فى الفجـرية

 يالله بنـــا على بــــاب الله يا صـــنايعية

يجعل صباحك صباح الخير ياسطى عطية

  
طلــــع النهــــار فتــــاح يا عليــــم     والجيــــب مافيهــــشى ولا مليــــــم

مين فى اليومين دول شاف تلطيم       زى الصـــــــنايعية المظاليـــــــــم

الصبر أمره طـــــــال                        وايش بعد وقف الحال

ياللى معاك المـــــــال                 برضه الفقيــر له رب كريم

 

 

 أولاد أوربــــا ما بيناموش                    عن الصـــــــنايع ما يونوش

 لافرنجى دايما حلق حوش                     والمصرى جنبه بيطلع بوش

 ســبع صـنايع فى إيدينـــــا                  والهـــــم جايـــــــر عليــــــنا

 يامـــا شــــكينا وبكــــــــينا                   يا أغنيــــا ليه ما تساعدوش

ما تشد حيلك يا بو صلاح                     إضربها صرمة تعيش مرتاح

خلى تكـــــالك ع الفتــــاح                    يالله بنا يالله الوقــت اهو راح

 الشمس طلعــت                         والمــــــلك لله

ما تشيل قدومك                         والعـــدة ويالله

 

 

 طلعت يا محلا نورها          مقام فا ماجير

لحن سيد درويش     كلمات بديع خيرى

 

 طلعت يا مـــــحلا نورها     شــمس الشموســه

يالله بنـــا نمـــــلا ونحلب     لبـــن الجاموســــه

قــاعد ع الســـاقية خللى     اســــــمر وحليــوة

عـوج الطــــــاقية وقاللى     غنى لى غنيــــــوة

قلت له يا محمد حبـــــك      لخـــفن لى عــقلى

ميتى النـار تبرد واعرف      راسى من رجــلى

طلعت يا مـــــحلا نورها

جاية من الترعة ســـمعوا     رنـــة خلخـــــالى

لحقـــونى ســبع جدعــان     طالبيـــن وصــالى

نظرونى يا خويا وراحوا     واقعين فى جمـالى

قدمــــوا لأبويا مهــــرى      ميتــين خيـــــــالى

طلعت يا مـــــحلا نورها

تعليق: الكلمات المغناة بصوت فيروز مغايرة للنص الأصلى !


 

عشان ما نعلا ونعلا مقام رى ماجير

لحن سيد درويش كلمات بديع خيرى

 

عشان ما نعلا ونعلا ونعلا    لازم نطاطى نطاطى نطاطى

 

بسلامته الوالي ابو زعيزع    مهجص باشا دقن تعيتع

وغرامه تمللي قال ايه    نترصص دايما حواليه

نروح واقفين زنهار    زي القط والفار

تلقاه دايما منفوخ نفشرله    طاخ طيخ طوخ

الرك على حبة بولوتيكه    وذمة كاوتشوك خربانة

ما دام الأمير ذمته أنتيكه    لازم الرعية تكون وحلانة

حذر فذر ياواد انت بعقلك    بعد الحنشصة دي اللى انت عليها

ياهل ترى الدنيا دي حتروقلك    وتشوف ماشاف قراقوش فيها

 

تعرفش المسألة ايه    عرنوس متعفرت ليه

بالحق  سلامات سلامات    ايش حال الافوات

محاسيبك    يا خى سيبك

اول شرط نطاطي البصلة    لسيدنا الوالي ونستعبط  له

مهما تسمعوا تهجيص    اعملوا روحكم بلاليص

مهما نسمع تهجيص    نعمل روحنا بلاليص

عشان ما نعلا ونعلا ونعلا    لازم نطاطي نطاطى نطاطى

 

 

ســالمة يا سلامة                               مقام بياتى

كلمات بديع خيرى                      ألحان سيد درويش

 

 

ســــالمة يا ســـلامة                         رحنا وجينا بالسلامة

صفر يا وابور واربط عندك             نزلنــــى فى البــــــلد دى

بلا أمـــــيركا بلا أوربـــــــا             مافى شئ أحسن من بلدى

دى المركب اللى بتجيــــــب            احســن من اللى بتــــودى

يا اسطى بشندى

سـالمة يا سلامة

سـلطة ما سلطة كله مكسب               حوشــــنا مــال وجيــــــنا

شفنا الحرب وشفتا الضرب              وشــــفنا الديناميت بعنــينا

ربك واحـــد عمرك واحــد                ادى احنا رحـــنا وجيــــنا

ايه خس عليــنا

سالمة يا سلامة

صلاة النيى ع الشخص منا               فرصـــة ميه بلا قافيــــــة

اللى ف جـــيبه يفنجــــر به              والبركة فى العين والعافية

ح تــاخد ايه م الدنيــا غيـر             الستر يا شيخ خليها ماشـية

دنيـــا فانيــــــة

سالمة يا سلامة

دى الغربـــــــة ياما بتــــــورى      بتخــــــلى الصــــنايعى بيـــرطن

مطـــرح ما يـــروح المصــرى      برضــه طـول عمــره ذو تفنــن

وحيـــــاة ربنـــــــا المعبـــــود      وى آر فرى جود ياسطى محمود

قــدها وقــدود

سالمة ياسلامة

 

أنا المصرى               مقام فا ماجير

كلمات بيرم التونسى            ألحان سيد درويش

 

أنا المصــرى كريـــم العنصرين               بنيــت المجـــد بيــن الإهراميـــــن

جدودى أنشــأوا العلـــم العجيــب                ومجرى النيل فى الوادى الخصيب

لهــم فى الدنيـــا آلاف الســـــنين                ويفــنى الكـــــون وهم موجـــودين

 واقــولك ع اللى خلانى                    أفوت أهلى وأوطانى

حبيب أوهبت له روحى                    لغيره لا أميل تـــانى

 

 

نشيد بلادى             مقام فا ماجير

لحن سيد درويش            كلمات سيد درويش

 

بــــــلادى بـــــــلادى           لك حبــى وفـــــؤادى

 مصـــر يا أم البــــلاد           أنت غايتى والمــــراد

 وعلى كل العبـــــــــاد          كم لنيــلك من أيـــادى

مصر يا أرض النعيم           ســدت بالمجــد القديـم

 مقصدى دفـــع الغريم           وعلى الله اعتمـــــادى

مصــر أولادك كــرام           أوفيـا يرعوا الزمــــام

 سـوف تحظى بالمرام           باتحـــادهم واتحـــادى

مصـر أنت أغلى درة           فوق جبين الدهر غرة

يا بـلادى عيشى حرة           واسلمى رغم الأعادى

 

 

القلل القنــاوى              مقام راست

لحن سيد درويش  كلمات بديع خيرى

 

 مليــــحة قوى                        القلل القنـــاوى

 رخيـصة قوى                        القلل القنـــاوى

قــرب حــدانا وخد قلتــــــين

 خســارة قرشك                       وحيـــــاة ولادك

 ع اللى ماهواش                      من طيــن بـلادك

ده ابن بلــــــدك                       ما يبلفـــــــكشى

ما تعـــــدموشى                       ولا يعدمـــكشى

دمك من دمه ما يفرقكوا شى

الدنيـــــــا مالها                        يا زعبــــــلاوى

 شـــقلبوا حـالها                        وين المـــــداوى

 شوفوا البـلاوى                        ده البنـــك ناوى

يرفــع دعــاوى                        علشـــان يتـاوى

 فى فلوسنا واحنا متقندليـــــن

مش بزيــــادانا                         بقيـــــــنا عـرة

 وكل حــــــاجة                        من شــغل بــره

 ده الفقــر طول                         قلــــع عينيــــنا

وخلا غيـــــرنا                         قلــس عليـــــنا

 يادى الفضيحة يا ناس حرام

ولحــــــد ميـتى                        ما نفوقش واصل

 والبيـه مقعمص                        قـــــــاعد يواصل

يشرب فى بيرة                        ويا منيــــــــــــرة

 واحنا فى حيرة                        جـــــد وكبيـــــرة

انتعـــــنا بقى يا جـد الحسين

 

 

والله تستاهل يا قلبى      مونولوج  مقام عجم

لحن سيد درويش   كلمات أمين صدقى

 

 

 والله تســــــتاهل يا قلبى      ليه تميــــــــل ما كنت خالى

انت أســــباب كل كربى      وانت أســـــــباب ما جرالى

إيه بقى اللى ح يواسينى      بعد ما انهــــــــدت آمــــالى

اذا كان حظى ناســــينى      مين اروح له اشكى له حالى

ان شكيت قلبى وحواسى     يعمــــلوا مؤامــــــــرة علىّ

وان بكيـت والحب قاسى     تشــــــتكى منـــــــــى عينىّ

أعمل ايه واحنا ف غربة     والأغـراب دول زى اليتامى

يا مين يواسيهم فى كربه      يامــــا بيقاســـــــــوا ويامــا

يارب كل من له حبيــب      طــــــال بعــــاده وللا قريب

ما تحـــــــــــرموش منه     وهــــــــاته له بالســـــــلامة

 

 

لحن العمال -  ما قلتلكش ان الكترة   مقام صول ماجير

لحن سيد درويش                              كلمات بديع خيرى

 

 

ما قلتلكش ان الكترة                            لابد يوم تغلب الشجاعة

واديك رأيت كلام الأمرا                    طلع تمام ولا فيهشى لواعة

غيرشى اللى كان هالك ابداننا                 ومطلع النجيل على عيننا

ان فهمى يكره حنا                  وايش دخل دول يا نا بس ف ديننا

دخل بناتنا اللى موقعنا                       فى بعضنا وراح لك متصدر

فقسنا لعبته واتجمعنا                          لا يضيع شرفنا الله لا يقدر

عاديك على اللى ادت له الدنيا              وش وبقى له تركة ومتاعة

تشوفنا احنا تقول حنفية                       وتشوفه هوه تقول بلاعة

 

عايشين فى وادى النيل نشرب           من عدادات على مللى وسنتى

من جاز لملح ومن سكر                    وترموايات لخواجة تريانتى

ربنا ما يوريكشى دوختنا               الجيب نضيف أما البيت أنضف

والهدمة دى اللى على جتتنا           محجوز عليها دى عيشة تقرف

الحق كله على الأغنيا                           إحم يا فرحتنا بشطارتهم

ملهيين فى روزا وماريا                         والسف نازل على أمتهم

إمتى بقى نشوف قرش المصرى            يفضل فى بلده ولا يطلعشى

انتوا بمالكم واحنا بإيدنا                    دى الإيد لوحدها ما تسقفشى

 

خفيــــف الـــــروح                       طقطــــوقة

تلحين سيد درويش                       مقام بياتى

 

 

خفيف الروح بيتعـاجب                   برمش العيــن والحاجب

خفيف الروح

غمـــز لى مرة بعيونـــه                 لقيت الحــب مضمـــونه

حرام ان كنت انا اخونه                  وعشقى له من الواجــب

خفيف الروح

تملى يحب يشــــــغلنى                   بســـهم اللحـــــظ والننى

أخاف اتقل يخاصــمنى                  ويهجـــرنى ويحـــرمنى

خفيف الروح

رأيت الأوفق ان جـانى                  حبيب القــلب نــــــادانى

أرد عليــه بأجفـــــــانى                 ولا أحسب حساب عازل

 خفيف الروح

 بحث وتحرير: د.أسامة عفيفى

ترقب نصوص وتسجيلات جديدة  لسيد درويش على هذه الصفحة

سيد درويش - موسيقى سيد درويش - أعمال سيد درويش - نصوص سيد درويش

أدوار سيد درويش - نصوص أدوار سيد درويش - تحليل أدوار سيد درويش

لحن الوصوليين - عشان ما نعلا - تحليل موسيقى